Sefaraires


SEFARAires
Aires de Sefarad en Buenos Aires
¡MAZALTOV! Pésaj, la fyesta de muestra libertad
Por Santó Efendi (desde Maryland
Este es el pan de la afrisyon ke komieron muestros padres en tyerras de Ayifto.
Todo el ken tyene de menester venga i koma,
Todo el ken tyene de menester venga i Paskue,
Este anyo aki, syervos.
A el anyo a el vinyen en tyerras de Israel, ijos joros.
Mos akodramos de muestra chikés ke en las nochadas de Pesaj, kon la famyia i amigos asentados a el derredor de la meza, muestro padre alevantava la tablá de el Seder para kantar “A Lajmá” en Ladino, al uzo de Izmir.
La fyesta de Pesaj es agora kuaji universala. Mesmo algunos goyim, por munchas kavzas, toman parte de eya. El rijo ke konosemos agora, de ande vino? Ken rijó ke mos asentemos i bevamos los kuatro vazos de vino? Ken avló primo, de los kuatro ijos i de sus karacteres : el savio, el malo, el aleshado i el ke ayinda no save komo demandar?
La Hagadá i la Estorya mos dizen ke después ke los Romanos derrokaron el Bet Amikdash, Rabi Yohanan ben Zakkai (ZL) reushó a fondar la Yeshivá de Yavné, serka de Ashdod. De esta yeshivá salieron munchas luminarias komo Rabi Eliézer, Rabi Yeoshua, Rabi Elazar, Rabi Akiva, Rabi Tarfon i otros. Eyos fueron los ke rijeron el Seder ke mosotros fyestamos, komo meldamos en la Hagadá.
Es bueno i mui nesesario ke todos mos ambezemos esto kon mas detalyo i ke se los ambezemos a muestros ijos i inyetos, en vista de lo ke mos akontesió en los dos mil anyos de muestra estoria en Evropa. Malgrado ke Pesaj es una fyesta alegre, tyene detrás una estoria no tan alegre. Komo todos savemos, en kada gerenansio i generansio, se alevanta algun loko poderozo ke mos kere eksterminar, komo bien lo estamos vyendo agora, ma “akadosh barujú mos salva de sus manos”.
En la Hagadá meldamos los yesurim pasados en la syervitud de Ayifto, las dyez makot i la salida al desyerto después de la ultima maká en la kuala muryó i el ijo bojor de Paró. Kantamos El “Dayenu” y el “Kavritiko” al escapar el meldado. Ma kualo mos keda después de todo esto? Mos keda la amistad de la famyia i de los amigos, la ajadut kon muestra gente, la memorya de muestros paryentes ke estan en Gan Eden i la aftajá de una vida amelyorada para el byen de todos, Amen. MOADIM LESIMJÁ. ¡¡ LE SHANÁ HABAÁ BIRUSHALAIM !!
Afrysion = aflicción / Ayifto = Egipto / Joros = libres / Tablá = bandeja / Uzo = costumbre, estilo / Rejir = dirigir / Reushir = tener éxito / Yesurim = penurias, sufrimientos / Maká = plaga / Aftajá = esperanza.



 

Creación y Dirección:
Arq. Luis León

Asesores de dirección y colaboradores permanentes
Sr. José Mantel
Dr.Santó Efendi (EEUU)

Declarado de "Interés Cultural" por Departamento de Cultura de AMIA ( Asociación Mutual Israelita Argentina) y
CIDICSEF ( Centro de Investigación y Difusión de la Cultura Sefaradí)

Todos los artículos, son colaboraciones ad-honorem de los respectivos autores, y reflejan sus opiniones personales. La dirección y redacción de SEFARaires, puede no coincidir con el contenido de algún artículo, siendo el mismo de total responsabilidad del autor. Se autoriza la reproducción total o parcial del contenido de los Sefaraires, mencionando la publicación y el autor.

SEFARaires es un magazín menzual independente, i el scopo es la difuzión de la kultura sefaradí i su lingua el djudesmo. Keremos ansí tanbién ke los lektores de todo el mundo, se ambezen la ystoria de los djidiós yegados de Turkya a la Argentina. Se invía por e-mail, sen koste para akeos ke mos lo demanden a muestro adereso.

SEFARaires es una  publicación mensual independiente, y su objetivo es la difusión de la cultura sefaradí y su lengua el judeo-español.  Se propone además, hacer conocer a sus lectores de diversas partes del mundo, la historia de los judíos de Turquía llegados a la Argentina. Se envía por e-mail, gratuitamente a quienes lo solicitan a nuestra dirección.

SEFARaires e una pubblicazione  mensile, indipendente, il  cui   obbiettivo   é la  diffusione  della  cultura sefardita  e della sua  lingua,il giudeo spagnolo. Si propone  inoltre di  fare conoscere ai suoi lettori, delle diverse parti del  mondo, la storia  dei giudei di  Turchia, arrivati a la Argentina. Si invia per email, gratuitamente  a coloro che  lo richiedano.

SEFARaires is an independent monthly  publication whose objective is the difusion of Sephardic culture and the Judeo-Spanish language.  Its objective is to make known to its readers all over the world the history of Jews of Turkey who immigrated to Argentina. SEFARaires is sent, without charge, by e-mail to all who request it.

SEFARaires est une publication mensuelle et indépendante qui a l'objectif de diffuser la culture séfarade et la langue judéo-espagnol . SEFARaires veut faire connaître aux lecteurs de plusieurs pays, l'histoire des juifs turcs, émigrés en Argentine. Vous pouvez demander l'envoi  gratuit  par E-mail à l'adresse